બાદરપુરથી પ્રગટ થતા જ્ઞાનોદય માસિકનું પ્રકાશન બંધ થતાંની સાથે જ સામયિકનો સ્વાદ ચાખી ગયેલ શીઆ જાફરી મશાયખી મોમિન જમાઅતમાં એક પ્રકારનો શૂન્યાવકાશ પેદા થયો હતો તેથી જ સાબરકાંઠાના નોકરી કરતા બુદ્ધિજીવીઓએ આવું જ એક સામયિક ફરીથી ચાલુ કરવાના ચક્રો ગતિમાન કર્યા. આ શુભ કાર્યની શરૂઆત કરવાના આશયથી તા ૧૮/૨/૧૯૮૧ ના રોજ શીઆ જાફરી મશાયખી જમાઅતનું એક મંડળ ઊભું કરવા માટે મહેરપુરાના મુકામ દરમિયાન આકાએ નામદાર પીર સૈયદ મોહંમદ મુશાહિદ હુસૈન બાવા સાહેબ (રહ.)ની દુઆ આશિષ લેવા માટે ગયા તો આપ નામદારે મંડળનું નામ શીઆ જાફરી મશાયખી વિકાસ મંડળ, સાબરકાંઠા આપ્યું અને આ કાર્યક્રમમાં સફળતા મળે એવી દુઆ પણ આપે ફરમાવી. આ તબક્કે આપે સામયિક ચાલુ કરવાની પરવાનગી પણ આપી અને સામયિકનું નામ જાફરી આવાઝ આપ્યું. આ મંડળના બંધારણમાં જાફરી આવાઝના પ્રકાશન ઉપરાંત ધાર્મિક, શૈક્ષણિક અને સામાજિક પ્રવૃત્તિઓ કરવાનો પણ નિર્ધાર કર્યો જે આજપર્યંત ચાલુ છે.